Համագործակցության նոր եզրեր Շվեդիայի Թագավորության հետ

25 մայիսի, 2015

Մայիսի 25-ին ՀՀ ՏԿԱԻ նախարարի առաջին տեղակալ Վաչե Տերտերյանը ընդունեց Շվեդիայի Թագավորության Ուփսալայի նահանգապետ Փիթեր Էդգարդտին, ՀՀ-ում Շվեդիայի գործերի ժամանակավոր հավատարմատար Մորթեն Էհնբերգին և արտաքին քաղաքականության գծով խորհրդական Մարտին Բրոզեկին, հանդիպմանը ներկա էին նաև՝ Շվեդիայի Թագավորությունում ՀՀ դեսպան Արտակ Ապիտոնյանը և Լոռու մարզպետ Արթուր Նալբանդյանը:

Սա Փիթեր Էդգարդտի առաջին այցն էր ՀՀ ՏԿԱԻ նախարարություն, որի ընթացքում քննարկվեցին երկու երկրների մազերի ու համապատասխան նահանգների միջև համագործակցության,մասնավորապես՝ Լոռու մարզի և Ուփսալայի նահանգի միջև բարեկամության հաստատմանն առնչվող հարցեր:

ՀՀ ՏԿԱԻ նախարարի և նախարարության անունից ողջունելով հյուրերին՝ Վ. Տերտերյանը համոզմունք հայտնեց, որ սա լավ առիթ է հայ-շվեդական համագործակցությունը որակական նոր մակարդակի բարձրացնելու համար: Վարչատարածքային բարեփոխումների իրականացման հարցում շվեդական փորձը Հայաստանի համար կարող է շատ օգտակար լինել, քանի որ Շվեդիայում երկու անգամ արմատական ռեֆորմներ են իրականցվել անցյալ դարի 50-ական և 70-ական թթ.-ներին: ՏԿԱԻ նախարարի առաջին տեղակալը հատկապես կարևորեց շվեդական Ուփսալա նահանգի և Լոռու մարզի համագործակցությունը, քանի որ այս երկու մարզերը համաչափ են թե’ տարածքի, թե’ բնակչության քանակի հարցում:

Շնորհակալություն հայտնելով ընդունելության համար՝ Ուփսալայի նահանգապետ Փիթեր Էդգարդտը նշեց, որ Հայաստանի հետ արդեն առկա համագործակցությունը ԲՈՒՀ-երի մակարդակում է, ուստի այն ընդլայնելու շրջանակում կարելի է համագործակցել նաև գիտական մակարդակում՝ մասնավորապես՝ գյուղատնտեսության և բնապահպանության գիտական ճյուղերում:

Խոսվեց նաև արտակարգ իրավիճակների կառավարման ոլորտի շուրջ համագործակցության մասին: Վ. Տերտերյանը մասնավորապես նշեց, որ ՏԿԱԻ նախարարության կողմից ներկայումս իրականացվում է Ճգնաժամային կառավարման ապակենտրոնացում, ինչը ենթադրում է արտակարգ իրավիճակներում համայնքներում արձագանքման արդյունավետության բարձրացում, և շվեդական փորձն այս հարցում նույնպես շատ օգտակար կարող է լինել:

Հանդիպման ավարտին ՏԿԱԻ նախարարի առաջին տեղակալ Վ. Տերտերյանը հյուրերին ուղեկցեց ՏԿԱԻՆ Ճգնաժամային կառավարման կենտրոն՝ ծանոթացնելու վերջիններիս կենտրոնի տեխնիկական հագեցվածությանն ու կառավարման գործընթացի իրականացման մեթոդներին:

Link to article:
http://mta.gov.am/hy/news/item/2015/05/25/4/

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր