Շվեդիայում ՀՀ դեսպան Արտակ Ապիտոնյանը պաշտոնական հանդիպումներ Ուփսալա քաղաքում

06 մայիսի, 2014

Շվեդիայում ՀՀ դեսպան Արտակ Ապիտոնյանը մայիսի 5-6-ը այցելեց եւ մի շարք պաշտոնական հանդիպումներ ունեցավ Ուփսալա քաղաքում։

Մայիսի 5-ին տեղի ունեցավ դեսպան Ապիտոնյանի հանդիպումը Ուփսալայի քաղաքային խորհրդի նախագահ Լարշ Բեքլյունդի հետ։ Քննարկվեցին Ուփսալայի եւ Հայաստանի համայնքների միջեւ ապակենտրոնացված համագործակցության հեռանկարները։ Մտքեր փոխանակվեցին Ուփսալայի զարգացման ծրագրերի փորձը Հայաստանում տեղայնացնելու, մշակութային, գործարար եւ զբոսաշրջային կապեր զարգացնելու, հայ համայնքի կողմից իրականացվող միջոցառումներին հնարավորինս աջակցելու վերաբերյալ։

Մայիսի 6-ին դեսպան Ապիտոնյանը հանդիպեց Ուփսալայի համալսարանի ռեկտոր Էվա Օկեսսոնին։ Զրուցակիցները քննարկեցին Ուփսալայի համալսարանի և Երևանի պետական համալսարանի միջև համագործակցության հնարավորությունները՝ հաշվի առնելով երկու երկրներում համալսարանների ունեցած առաջատար դիրքերը և ընդհանրությունները։ Մտքեր փոխանակվեցին ուսանողների եւ պրոֆեսորա-դասախոսական կազմի փոխանակումների, նաև հայ ուսանողների կողմից Ուփսալայի համալսարանում կրթություն ստանալու հնարավորությունների վերաբերյալ։

Մայիսի 5-ի երեկոյան դեսպան Ապիտոնյանը Ուփսալայի «Հայ տուն» ակումբում հանդիպեց տեղի հայ համայնքի ներկայացուցիչների հետ, քննարկվեցին հայ-շվեդական հարաբերությունների համատեքստում Շվեդիայի հայ համայնքի հետ գործակցության հիմնական ուղղությունները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր