Անկախության օրվա միջոցառումներ

27 սեպտեմբերի, 2018

Ս․թ․ սեպտեմբերի 26-ին Շվեդիայում ՀՀ դեսպանությունը, ՀՀ Անկախության օրվա կապակցությամբ, Ստոկհոլմի «Կոնսերտհյուսեթ» համերգային համալիրի «Գրյունվալդ» սրահում կազմակերպել էր հայկական «Կադենս» անսամբլի համերգը և ընդունելություն։
Հայաստանի անկախություն 27 տարիների անցած ճանապարհի, առկա մարտահրավերների և ժողովրդավարության ամրապնդմանն ուղղված բարեփոխումների, համաժողովրդական շարժման վերաբերյալ ընդգրկուն ելույթով հանդես եկավ ՀՀ դեսպան Արտակ Ապիտոնյանը։ Նա ներկայացրեց նաև հայ-շվեդական հարաբերություններում վերջին տարիներին գրանցված առաջընթացը, մասնավորապես, քաղաքական երկխոսությունը, տնտեսական կապերը և կրթամշակութային փոխանակումները, շնորհակալություն հայտնելով այդ գործում իրենց ներդրումը բերած և դեսպանության ջանքերին աջակցած անհատներին և կազմակերպություններին։ Դեսպան Ապիտոնյանն անդրադարձավ նաև տարվա հոբելյաններին՝ ՀՀ անկախության 100-ամյակ և Երևանի հիմնադրման 2800-ամյակ, ինչպես նաև Երևանում կայանալիք Ֆրանկոֆոնիայի գագաթաժողովին և հարակից միջոցառումներին։
«Կադենս» անսամբլի կողմից հանդիսատեսին ներկայացվեցին հայ և միջազգային դասական և ժամանակակից կոմպոզիտորների ստեղծագործությունների ընտրանի։
Շուրջ չորս հարյուր հյուրերի մեջ էին տասնյակ դեսպաններ, ներկա և նախկին պատգամավորներ, քաղաքական, հասարակական եւ մշակութային գործիչներ, դիվանագետներ, մամուլի ներկայացուցիչներ, շվեդահայ համայնքի անդամներ:
Համալիրի նախասրահում դեսպանությունը կազմակերպել էր նաև Երևանի 2800-ամյակին նվիրված լուսանկարների ցուցահանդես։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր