Արմին Վեգների լուսանկարների ցուցահանդեսը, Ստոկհոլմում

25 օգոստոսի, 2015

Օգոստոսի 25-ին Ստոկհոլմի Ռազմական թանգարանում (Armémuseum) բացվեց «Արմին Վեգներ. Հայոց ցեղասպանության ականատեսը» խորագրով ցուցահանդեսը, որում ներկայացվել են Վեգների շուրջ երեք տասնյակ լուսանկարներ հեղինակի գրառումներով և բացատրագրերով։

Ցուցահանդեսը կազմակերպվել է Շվեդիայում ՀՀ դեսպանության Ռազմական թանգարանի, և «armenica.org» կազմակերպության համատեղ ջանքերով՝ Շվեդիայում Հայոց ցեղասպանության 100-րդ տարելիցի միջոցառումների շրջանակում։ Տարվա ընթացքում Շվեդիայում հայկական միությունների համադրող կենտրոնի ջանքերով լույս է տեսել նաև Արմին Վեգների «Հայերի արտաքսումը դեպի անապատ» գրքի շվեդերեն ծանոթագրված հրատարակությունը։

Բացմանը մասնակցում էին խորհրդարանի փոխխոսնակ Բյորն Սյոդերը, քրիստոնեա-դեմոկրատների խմբակցության ղեկավար Անդրեաս Կարլսոնը, պատգամավորներ, Ստոկհոլմում հավատարմագրված դեսպաններ, հասարակական, քաղաքական և մշակույթի գործիչներ, լրագրողներ, հայ համայնքի ներկայացուցիչներ։ Բացման խոսքով հանդես եկան Ռազմական թանգարանի տնօրեն Էվա-Սոֆի Էրնստելլը և պատմաբան Վահագն Ավետյանը։

Ցուցահանդեսը գործելու է երեք ամիս։ Այն լայնորեն գովազդվել է Ստոկհոլմի կենտրոնական փողոցներում տեղադրված մշակութային վահանակների միջոցով։

Ռազմական թանգարանը հանդիսանում է Ստոկհոլմի առաջատար մշակութային հաստատություններից մեկը և ներառված է պարտադիր կրթական ծրագրերի մեջ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր