Աշխարհի պաշտոնական ֆուտբոլի առաջնությանը մասնակցելու նպատակով Արցախի (Լեռնային Ղարաբաղի) Հանրապետության ֆուտբոլի ազգային հավաքականը ժամանեց Շվեդիա

30 մայիսի, 2014

Հունիսի 1-ից 8-ը Շվեդիայի Օստերսյունդ քաղաքում կայանալիք ՖԻՖԱ-ին չանդամակցող հավաքականների աշխարհի պաշտոնական առաջնությանը մասնակցելու նպատակով Արցախի (Լեռնային Ղարաբաղի) Հանրապետության ֆուտբոլի ազգային հավաքականը մայիսի 30-ին ժամանեց Շվեդիա։

Արցախի հավաքականին Ստոկհոլմի «Արլանդա» օդանավակայանում մեծ խանդավառությամբ դիմավորեցին Շվեդիայի հայ համայնքի ներկայացուցիչները: Այնուհետև հավաքականի մարզիկները այցելեցին Շվեդիայում ՀՀ դեսպանություն:

Կեսօրին Շվեդիայի գեղատեսիլ հանգստյան գոտիներից մեկում արցախցի մարզիկների համար ջերմ ընդունելություն և հյուրասիրություն կազմակերպվեց Շվեդիայի հայկական միությունների համադրող կենտրոնի կողմից:

Հիշեցնում ենք, որ ԼՂՀ հավաքականը առաջնության խմբային փուլի խաղերն անցկացնելու է հունիսի 1-ին ժամը 19.00-ին՝ Մեն կղզու (Ellan Vannin) և հունիսի 3-ին ժամը 19.00-ին՝ Նիցցայի հավաքականների հետ:

Այս առաջնությունը բացառիկ հնարավորություն է տալիս չճանաչված երկրների ազգային հավաքականներին սեփական դրոշի ներքո հանդես գալ ֆուտբոլային աշխարհում, որին առաջին անգամ մասնակցելու է Արցախի ազգային հավաքականը:

Եկեք միասին քաջալերենք մեր հայրենակիցներին!

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր